Ова е екипата на најновото театарско дело „Скршената стомна“

Извонредна театарска игра во новата претстава на Интимен театар „Скршената стомна“ ќе покажат двајцата актери Маја Андоновска Илијевски и Никола Пројчевски, и двајцата актери од Битолски театар . Досега изиграле многубројни улоги во над триесет претстави, а добитници се и на повеќе награди.

двајцата актери Маја Андоновска Илијевски и Никола Пројчевски

Оваа претстава, осма по ред на независната театарска куќа „Интимен театар“ е работена по мотиви од Хајнрих Фон Клајст, германски автор од почетокот на 19 век и авторски текстови на Билјана Крајчевска . Во заглавието на пиесата The Broken Jug, генерално  станува збор за корумпираното судство, а во „Скршената стомна“ само десет проценти од материјалите се од пиесата, а останатото се авторски материјали на Крајчевска. Претставата е во режија на Софија Ристевска, која всушност ги режира сите претстави на овој театар.

- „Скршената стомна“ е расказ за изгубениот и заблудениот човек што нема капацитет да се бори, а секогаш го избира патот на финансискиот прогрес. Со помош на огромната индустрија, таканаречена „пластична хирургија“, надворешноста се доведува до перфекција, а душевноста затапува и го губи својот фокус. Оттука и идејата дека по улиците шетаат полумртви кукли, жртви на чудовишниот капитализам, што пополека се прекршуваат и ја губат својата животна рамнотежа - вели Ристевска за своето најново дело.

„Скршената стомна“ е расказ за изгубениот и заблудениот човек што нема капацитет да се бори, а секогаш го избира патот на финансискиот прогрес - вели режисерката Ристевска

Инаку, таа две години е вработена во Велешки театар, а во март оваа година ја направи "Старицата од Калкута" од Ханок Левин. Оваа претстава учествуваше на овогодишниот фестивал „Војдан Чернодрински“ во Прилеп и освои награди за млад актер(Талија Настова) и за кореографија ( Кире Миладиноски). Тој, пак работеше на сите досегашни претстави на „Интимен театар“, а кореограф е и на најновата, „Скршената стомна“. Драматург е Билјана Крајчевска, која покрај авторските материјали за оваа претстава како драматург се јавува на сите досегашни претстави на „Интимниот театар“. Таа е вработена во Битолски театар. Дизајнот на звук е на  Златко Кузевски, дизајн на светло на Томе Ѓорѓиевски. Шминката ја направи Ксенија Вангеловска, а фризурите Кристина Серафимова Кики. За фотографиите беше задолжен Петар Тасевски, а за дизајнот Владимир Видановски. Премиерата на претставата „Скршената стомна “ е на 30 декември, петок со почеток во 20 часот.

Билјана Крајчевска-драматург

Кире Миладиноски-кореограф

„Интимен театар“ работи со полна пареа

„Скршената стомна“ е осмата претстава на „Интимен театар“ од Битола кој постои од февруари, 2010 година. Пред да добие свое интимно катче за работа, театарот, претставите ги работеше во најразлични простори. Но, од октомври 2013 година, има свој театарски простор, во Битола, на ул. Стив Наумов, бр. 35, каде претставите може да ги следат околу шеесет љубители на театарската уметност.

Основната цел на „Интимен театар“, е да поставува текстови од современи драмски автори, кои што зборуваат за социјални проблеми во општеството и кои што го анализираат животот на современиот човек со сите негови плусеви и минуси. 

Ова се претставите што досега ги реализираше оваа независна театарска куќа:

Од претставата Трансферату одиграна во 2013 година

2010 година -  „Лили“ (Кабаре Џубокс, Скопје)

2011 година -  „Љубовницата“ (Кабаре Џубокс, Скопје)

2011 година -  „Љубовта е демоде“ (Ноќен клуб Расчекор, Битола)

2013 година -  „Лола“ (Кабаре Џубокс, Скопје)

2013 година -  „Трансферату“ (Интимен Театар, Битола)

2014 година - „Со љубовта шегување нема“ (Интимен Театар Битола)

2015 година - „Будење на пролетта“ (Интимен Театар, Битола)

2016 година - „Скршената Стомна“ (Интимен Театар, Битола)

„СКРШЕНАТА СТОМНА“, НОВА ПРЕТСТАВА ВО ИНТИМЕН ТЕАТАР

„Скршената стомна“ е новата претстава која се подготвува во „Интимен театар“ од Битола, работена по мотиви од Хајнрих Фон Клајст, германски автор од почетокот на 19-ти век и авторски текстови на Билјана Крајчевска. Режисерката Софија Ристевска објаснува дека „Скршената стомна“, е претстава за човекот на дваесет и првиот век, којшто е претворен во шуплива кукла, манипулирана само и единствено од моќта на капиталот.

Во новата претстава играат Маја Андоновска Илијевски и Никола Пројчевски

-Емоциите, љубовта и семејните социјални врски, сè поретко се појавуваат во секојдневието на човекот, што е пласиран и определен само и единствено од пазарот на трудот. Кариерата и финансиската моќ се ставени пред основните човечки начела и принципи. Инстант живеењето нè осакатува и не претвора во осамени, егоистични и антисоцијални индивидуи. Во натпреварот за поуспешна и поисплатлива кариера, станува сè потешко да се создадат семејство и поколение, па оттука се поставува прашањето дали капиталот е доволно добар за да го замени нашето неродено дете, нашите љубовни врски... Дали капиталот е доволно емоционален да го замени човечкиот стремеж за социјална припадност?- вели Ристевска за најновиот проект на “Интимен театар“, кој со нетрпение сака да го претстави на публиката. Во новата претстава играат Маја Андоновска Илијевски и Никола Пројчевски.

ВЕДЕКИНД БИЛ ЗАБРАНУВАН И ЦЕНЗУРИРАН

Новата седма претстава на „Интимен театар“ чија премиера е закажана на 28 декември (понеделник) и на 30 декември (среда) е правена по пиесата на Франк Ведекинд, „Будење на пролетта“ и по документарни материјали, поточно лични раскази собрани од самата екипа.

Франк Ведекинд (1864-1918) е германски писател кој пишувал во времето кога Фројд ја пласира својата теорија за сексуалноста, во почетокот на 20 век.

Почнал како новинар и актер, пишувајќи песни и пантомими. Неговата прва драма „Будење на пролетта“ е всушност и негово најпопуларно дело. Голем дел од неговата продукција ја чинат драми во кои главно место зазема светот на нагоните и страстите. Често се повикува и на малограѓанскиот морал и општествени конвенции кои ја опишуваат детално човековата исконска страст и љубов.

„Будење на пролетта“ предизвикала многу бурни реакции во тоа време. Ова дело ја критикува сексуално угнетувачката култура на 19 век и дава дава жива драматизација на еротските фантазии. Со оглед на контроверзните теми (пубертет, сексуалнос, силување, злоупотреба на деца, хомосексуалност, самоубиство, абортус), претставата често била забранета или цензурирана.

За прв пат е изведена на англиски јазик во 1917 година во Њујорк, пред одбрана публика. Ведекинд има големо значење за развојот на експресионизмот во германската драматургија, а извршил големо влијание на многу писатели во средна Европа.

РЕЖИСЕРКАТА РИСТЕВСКА ЌЕ ГЛУМИ ВО НОВАТА ПРЕТСТАВА

Најголемо изненадување во новата претстава „Будење на пролетта“, која се подготвува во „Интимен театар“ е режисерката Софија Ристевска која за првпат ќе се проба и како актерка. Покрај, неа во новата претстава, играат и актерот Здравко Стојмиров и Стефанија Милевска, позната пејачка, танчерка и актерка.

Режисерката на „Будење на пролетта“ вели дека отсекогаш сакала да се стави во кожата на актерите.

- Ова е прв пат да глумам во моја претстава. Се решив на овој чекор за да ја запознаам уште подобро професијата на моите глумци, за да можам во иднина уште поумешно и поиновативно да работам со нив - вели Ристевска.

Режисерката Софија Ристевска ќе глуми 

Таа дипломирала театарска режија во Софија, Бугарија и досега има режирано над триесет претстави во најразлични театри во државата, во Србија и Бугарија. Нејзиниот „Интимен театар“ постои веќе пет години и во овој независен културен простор, таа се обидува да креира театарски свет заснован врз документарни материјали, најчесто создавани од учесниците во проектот.

Актерот Здравко Стојмиров, дипломирал актерска игра во Благоевград, Бугарија и досега учествувал во речиси сите продукции на „Интимен Театар. Работи и во „Битолски“ и „Прилепски театар“, како и во многу проекти на „Мал Драмски театар“ од Битола. Неговиот актерски израз е многу специфичен и се карактеризира со големи трансформации,  изразени преку лабораторната работа со телото и гласот.

Актерскиот израз на Здравко Стојмиров е многу специфичен

Стефанија Милевска е млада пејачка, танчерка и актерка, којашто завршила џез пеење во Софија, Бугарија. Нејзините вокални и физички способности, даваат големо богатство и надоградување на нејзиното актерско присуство на сцената. Стефанија беше дел од претставата „Со љубовта шегување нема“, на „Интимен театар“, а ова е нејзина втора соработка со нашата театарска куќа. Овој месец, Стефанија го промовираше и својот прв музички албум „Ретро – Перспектива“ и имаше настапи во живо во речиси сите поголеми градови во државата. „Будење на пролетта“ е работена по текстови од Франк Ведекинд и документарни материјали. Режијата е на Софија Ристевска, драматург е Билјана Крајчевска, а кореографијата е на Кире Миладиноски.

Стефанија Милевска е млада пејачка, танчерка и актерка

ВО ИНТИМЕН ТЕАТАР СЕ БУДИ НОВА ПРЕТСТАВА

Интимен театар наскоро ќе ја изненади својата верна публика со нова премиера, која овојпат е целосно посветена на жената. Најновиот проект „Будење на пролетта“, ги разгледува проблемите на женската популација во нашето општество, како сегрегацијата и етикетирањето на секојдневно ниво, врз различни основи. Во ова време на суров неолиберализам, кога жената има професија и кариера, а плус мора да е добра мајка, домаќинка, сопруга и љубовница, таа се соочува со константната нетрпеливост и нетолерантност од страна на општеството, што не е едуцирано и истренирано, за да го толерира моделот на ЖЕНА – ЛИДЕР.

- Нашата претстава со голема доза на хумор и самокритика, ги разгледува проблемите на жените што се борат активно за своите позиции и не потпаѓаат под ничие влијание. Ги разгледуваме нивните проблеми со тежината и нивното активно посетување на часовите по аеробик. Ги разгледуваме и ситуациите со шефовите мажи во фирмите, што редовно им предизвикуваат непријатни ситуации. Ги анализираме и желбите за екстремни спортови, што создаваат високо ниво на андреналин, како заштитен механизам против светот што не опкружува и на крајот зборуваме за свадбите и за сите подготовки окулу нив. Со огромна доза на хумор анализираме со колку многу предизвици се соочува жената и колку многу очекувања се вперени во неа. А за да биде иронијата поголема, дури и кога е најзаслужна, таа тешко го добива своето признание -вели режисерката на претставата Софија Ристевска.

Режисерката Софија Ристевска

Фотографија од претставата „Будење на пролетта“

Новата претстава е работена по текстови од Франк Ведекинд и документарни материјали. Режијата е на Софија Ристевска, драматург е Билјана Крајчевска, а кореографијата е на Кире Миладиноски.

 

ЗБОР-ДВА ЗА АКТЕРСКАТА ЕКИПА

Тројца актери ги толкуваат улогите во нашата претстава „Со љубовта шегување нема“ – Здравко Стојмиров, Катерина Аневска и Стефанија Милевска. Режисер на новото дело на „Интимен театар“ е Софија Ристевска. Користиме текстови од францускиот писател Алфред де Мисе и документарни материјали. Премиерата е на 27 декември (сабота) во 20 часот. Закажавме изведби и на 28 и 29 декември во истиот термин. Во меѓувреме запознајте се со тројцата актери од „Со љубовта шегување нема“.

Здравко Стојмиров – Наградуван глумец во потпетици

Здравко Стојмиров толкува женски лик во „Со љубовта шегување нема“. Ја разработуваме идејата дека полот добиен со раѓањето не го определува нашиот вистински пол. Секој има право да ја донесе таа одлука за себе, а користиме и приказни за припадници на ЛГБТИ заедницата. Здравко играше и во првата продукција на „Интимен театар“ откако влеговме во нашиот простор на улица Стив Наумов број 35, претставата „Трансферату“. Има дипломирано на универзитетот „Неофит Рилски“ во Бугарија. Играше во „Дневникот на лудиот“ во режија на Роберт Симоновски, а за изведбата доби прва награда на фестивалот „Фиат“ во Подгорица. Забележливи се и неговите улоги во „Црвено“, „Мажот е маж“ и „За домот се работи“ на режисерот Мартин Кочовски. Со Софија Ристевска има соработувано и на „Приказна за зоолошката“ и „Домот на Бернарда Алба“.

Катерина Аневска – На независна сцена и во национален театар

Катерина (десно на фотографијата доле) има дипломирано на Факултетот за драмски уметности во Скопје. Со нашата режисерка Софија Ристевска веќе работеше на „Љубовницата“ и „Љубовта е демоде“. Најголемиот број од нејзините премиери се на сцената на битолскиот театар. Глуми во актуелната претстава „За домот се работи“ на Мартин Кочовски. Има соработувано со словенечкиот режисер Диего де Бреа, а значаен дел од нејзината професионална биографија се: „Каренина Made in Macedonia“, „Травничка хроника“, „Обична приказна“ итн.

Стефанија Милевска – Поп и џез пејачка во актерска кожа  

Стефанија (лево на фотографијата) има дипломирано на катедрата за поп и џез пеење на Новиот бугарски универзитет во Софија. Беше дел од бендот „Блусис“ и кореограф на мјузикл и фестивали. Долг период работи и во модното студио „Анастасија“. Заклучокот е дека манекенството и модерниот балет заземаат голем дел од нејзината биографија. Стефанија заедно со Кире Миладиновски работеше и на кореографијата на нашата претстава „Со љубовта шегување нема“.